Þar sem lognið hlær svo dátt

Við Norðfjörð er nyrsti og fjölmennasti byggðarkjarninn í Fjarðabyggð. Árið 1895 var löggiltur verslunarstaður á Nesi í Norðfirði en þá var hafin þar þorpsmyndun. Ástæður þéttbýlisþróunarinnar eru mjög ljósar, því um 1870 hófst saltfiskverkun í miklum mæli og við það elfdist útgerð, en Norðfjörður liggur mjög vel við gjöfulum fiskimiðum.

Árið 1905 urðu merk tímamót þegar Norðfirðingar eignuðust sína fyrstu vélbáta og voru á þeim tíma gerðir út um 60 bátar til fiskveiða en íbúar Nesþorps voru þá orðnir um 355 talsins. Hafði því talsverð fjölgun íbúa átt sér stað frá því árið 1895 er íbúar voru um 180. Árið 1913 var þorpið aðskilið frá sveitinni og nefnt Neshreppur. Þá bjuggu þar 636 íbúar. 
 
1. janúar 1929 fékk Neshreppur kaupstaðarréttindi og nefndist Neskaupstaður. Íbúafjöldi var þá 1.103.  Íbúar í Norðfirði um 1990 voru 1.754. Næstu árin fækkar íbúum nokkuð. Haustið 1993 var samþykkt að sameina Norðfjarðarhrepp og Neskaupstað undir nafni Neskaupstaðar og tók sameiningin gildi 11. júní 1994 og voru þá mörk sveitarfélagsins orðin þau sömu og fyrir 1913.  Norðfjörður er í dag fjölmennasti byggðarkjarninn í Fjarðabyggð en íbúar eru um 1.530. 
 
Sjávarútvegur, fiskvinnsla og tengd þjónusta er aðalatvinnuvegur íbúa í Neskaupstað og þar er eitt af stærstu sjávarútvegsfyrirtækjum landsins, Síldarinnslan h/f,  sem rekur eitt stærsta og fullkomnasta fiskiðjuver í Evrópu, þar sem uppsjávarfiskur er unnin til manneldis. Fjórðungssjúkrahúsið er einnig fjölmennur vinnustaður. Þá er nokkur landbúnaður í Norðfjarðarsveit.

Sorry we can't display map

Þjónusta

Auk þess sem áður er getið um áhugaveða staði er ýmislegt fleira við að vera á Norðfirði. Hægt er að fara í sund, golf, veiði, siglingu um nálæga firði, kæjakferðir og skoða söfn og handverkshús. Um verslunarmannahelgina er haldin mikil fjölskylduhátíð sem kallast Neistaflug. Margt fleira mætti nefna, en sjón er sögu ríkari.

 

Áhugaverðir staðir

Vöðlavík

Vöðlavík

Eyðivík sunnan Gerpis þar sem áður var fjöldi bæja. Náttúrufegurð er mikil í víkinn og margt að sjá, til að mynda skemmtileg sandfjara og hreindýrahjarðir yfir sumarið.

Söfn

Safnahúsið í Neskaupstað

  • Sjóminja- og smiðjumunasafn Jósafats Hinrikssonar,
  • Málverkasafn Tryggva Ólafssonar og
  • Náttúrugripasafnið í Neskaupstað.

Þessi skemmtilegu söfn eru í Safnahúsinu sem er rautt hús í miðjum bænum.  Þar er opið alla daga vikunnar frá 1. júní til 31. ágúst: 13:00 - 17:00. Utan þess tíma, eftir samkomulagi við safnvörð.

Fólkvangurinn við rætur Nýpunnar

Úr fólkvanginum í Neskaupstað

Við rætur Nýpunnar, hæsta standbergs í sjó fram á Íslandi, er fyrsti friðlýsti fólkvangur landsins og tók friðlýsingin gildi árið 1972. Í fólkvangnum eru stuttar gönguleiðir og áhugaverðir staðir svo sem um Urðir og Hagann,sem er gönguleið með sjónum út í Páskahelli, sem er hvelfing við sjávarborðið. Í hvelfingunni eru holur eftir 10-12 milljón ár gömul gildaxin tré. Þar er fræðslustígur með ábendingum um ýmis náttúrufyrirbæri. Skemmtilegur útivistarstaður.

Hengifoss-Norðfirði

Hengifoss

Hæsti foss í Norðfirði fellur í samnefndri á úr Oddsdalnum niður í Seldal í afar fallegu og gróðursælu gljúfri.

Snjóflóðagarðurinn

Snjóflóðavarnargarðurinn - The Wall

Ofan byggðarinnar eru risin mikil mannvirki til varnar ofanflóðum í Neskaupstað. Búið er að koma fyrir gönguleiðum í kring um mannvirkin og hægt er að ganga uppi á þeim og njóta útsýnisins yfir Norðfjörð.

Skíðamiðstöðin Oddsskarði

Oddsskarð

Skíðasvæði Fjarðabyggðar er í Oddskarði og er ein af perlum sveitarfélagsins. Þar er skíðalyfta, sem hefst í 513 metra hæð og þegar upp á topp er komið, í 840 metra hæð, blasir við ægifagurt útsýni yfir Reyðarfjörðinn. Svæðið er eitt af skemmtilegustu skíðavæðum á Íslandi og gengur undir nafninu "Austfirsku Alparnir".  Á svæðinu er barnalyfta og ágætur skíðaskáli með veitingaaðstöðu.

Gerpissvæðið

Gerpir

Fjarðabyggð er sannkölluð paradís fyrir göngufólk. Gerpissvæðið milli Norðfjarðar og Reyðarfjarðar er að verða eitt af vinsælustu gönguleiðavæðum landsins og hefur Ferðafélag Fjarðamanna verið ötult við að merkja þar gönguleiðir eins og víða um sveitarfélagið. Göngukort þeirra fæst í upplýsingamiðstöðvum og verslunum víða í Fjarðabyggð.

Rauðubjörg

Rauðubjörg

Falleg líparítbjörg á Barðsnesi við Norðfjarðarflóa. Norðfirðingar hafa löngum sagt að ef sólin glampar á Rauðubjörg að kvöldi viti það á gott veður næsta dag.

Hellisfjörður

Hellisfjörður að vetrarlagi

Fallegur og gróðursæll eyðifjörður sem gengur inn úr Norðfjarðarflóa. Þar má enn sjá leifar gamallar hvalstöðvar sem starfrækt var í byrjun 20. aldar.

Viðfjörður

Viðfjörður

Syðstur fjarðanna þriggja við Norðfjarðarflóa. Þórbergur Þórðarson skrifaði bókina Viðfjarðarundrin, um mikinn draugagang sem átti sér stað í Viðfirði.  Allt fram á síðustu ár hafa menn orðið varir við undarlegar uppákomur í þessum ævintýralega firði.

Sandvík

Sandvík

Eyðivík norðan við Gerpi, þar sem áður var austasta byggt ból á landinu. Við Sandvík er kenndur draugurinn Glæsir sem fylgir gjarnan Sandvíkingum og tekur ofan höfuðið þegar hann heilsar fólki.

Gerpir

Gerpir

Austasti oddi landsins og sennilega elsti hluti Íslands. Á Gerpissvæðinu er fjöldi vinsælla gönguleiða.