Gönguleiðir

Fjarðabyggð er draumastaður fyrir útivist og hefur sveitarfélagið að geyma eitt mest spennandi göngusvæði Íslands sem er Gerpissvæðið milli Norðfjarðar og Reyðarfjarðar en svæðið er jafnframt austasti hluti landsins.

Fyrir þá sem vilja áskorun er hægt að vinna sér inn titilinn Fjallagarpur Fjarðabyggðar með því að ganga á fjöllin fimm í Fjarðabyggð sem ferðafélag svæðisins hefur valið. Um er að ræða Kistufell 1239 m, Goðaborg 1132 m, Svartafjall 1021 m, Hólmaháls 985 m og Hádegisfjall 809 m. Þátttakendur verða sér út um sérstök stimpilkort og efst á hverju fjalli er svo stimplað.

Eftir fimm fjöll og fimm stimpla hefur viðkomandi hlotið titilinn Fjallagarpur Fjarðabyggðar, kemst á vefsíðu félagsins og fær einnig verðlaunagrip að launum. Þetta er svo sannarlega erfiðisins virði þar sem á leiðinni má njóta kyrrðar, skoða fjölbreytt gróðurfar og fylgjast með fugla og dýralífi.

Á haustin er hægt að leggast í brekkurnar, tína aðalbláber og alltaf er hægt að fá sér svalandi hressingu úr næstu lækjarsprænu. Að ganga í fallegu umhverfi er góð líkamsrækt fyrir alla og í Fjarðabyggð er hægt að finna gönguleiðir við allra hæfi.

Ferðafélögin hafa verið ötult við á síðustu árum að merkja gönguleiðir á Austfjörðum. Einnig hefur verið gefið út gönguleiðakort af svæðinu frá Seyðisfirði og til Reyðarfjarðar og annað kort yfir svæðið frá Reyðarfirði yfir til Stöðvarfjarðar.

Fjölmargar leiðir hafa verið stikaðar m.a. frá Norðfirði og yfir í Mjóafjörð um Miðstrandarskarð og frá Vöðlavík og yfir í Sandvík um Gerpisskarð.

Leiðin frá Mjóafirði yfir í Norðfjörð er hluti af samfelldri gönguleið sem stikuð er frá Borgarfirði eystri yfir í Skriðdal og gönguleiðin frá Vöðlavík yfir í Sandvík er hluti af gönguleiðakerfi á Gerpissvæðinu sem nú hefur nánast allt verið stikað.

Göngu- og gleðivikan Á fætur í Fjarðabyggð er haldin síðustu heilu vikuna í júní og þar er í boði fjölbreyttar göngur við allra hæfi, kvöldvökur, náttúruskóli fyrir börnin og margt fleira.

Ferðafélögin gefa út dagskrá fyrir hvert ár þar sem má sjá upplýsingar um skipulagðar gönguferðir.